MAMMON AVA TENZI
“Kana mari yava hana yako” — 1 Timoti 6:9–10; 1 Timoti 1:19; Mateu 6:24
By Sir Chaxi
Mari haisi dhimoni,
Pfuma haisi chivi…
Asi kana rudo rwemari
rwabata moyo nesimbi,
hana inotanga kunyarara.
Munhu wotanga kusaona munhu—
wongoona mukana.
Wotanga kusaona hama—
wongoona pundutso.
Wotanga kusaona rudo—
wongoona mutengo.
Ko mari ndiyo tenzi wako?
Kana kuti Mwari ndiye Tenzi wako?
───
Mari yakapinda neruoko,
ikazogara mumwoyo,
yakauya iri mushandi,
ikazopedzisira yava mambo.
Wotanga kuyera vanhu nezvikwama,
kuyera hama nezvavanokupa,
kuyera shamwari nezvadzosera,
rudo rwava bhizimusi,
ushamwari hwava accounting.
Munhu waimboti “hama yangu,”
nhasi woti “anobatsirei?”
Waibata ruoko rwake nezuro,
nhasi wamupfuura semunhu wausingazivi.
Chigarisano chava nechiyero,
rudo rwava nemutengo,
kuvimbika kwava kutengeswa,
hana yava kuvharwa negoridhe.
───
Nhambo imwe chete,
unonyaradzwa nehana yako.
Nhambo mbiri,
unoityaira parutivi.
Nhambo nhatu,
unotanga kusaichinzwa.
Kusvika hana yaita sedanda
rakapiswa nesimbi inopisa—
haicharwadzi,
haichayambiri,
haichatauri!
───
LEAD: Mari yakava tenzi!
CHOIR:Hana yanyarara!
LEAD: Mari yakava mwari!
CHOIR:Rudo rwanyangarika!
LEAD: Wapi munhu wawaida?
CHOIR:Wakamusiya nokuda kwemari!
LEAD: Wapi rukudzo rwawaiva narwo?
CHOIR:Wakarutengesa nokuda kwemari!
ALL:
Haukwanisi kushumira Mwari naMamoni!
Moyo mumwe,
zvigaro zviviri hazvigari!
Mari ngairambe iri mushandi,
kwete tenzi!
Pfuma ngairambe iri mudziyo,
kwete mwari!
───
“Chara chimwe hachitswanyi inda,”
asi mari yapinda mumwoyo,
munhu anozviona ari ega,
vamwe vose vava matombo etsoka.
“Mombe haibvunzi muridzi wayo kuti yakadyiwa kupi,”
asi kana pfuma yava tenzi,
munhu anozvikanganwa—
kuti zvaanazvo zvakapiwa kuti ashande navanhu,
kwete kuti atsike vanhu.
“Rume rimwe harikombe churu,”
asi godo nemari zvinoti,
“Zvose ndezvangu!”
Hama dzinoparadzana,
mhuri dzinotsemuka,
shamwari dzinoraswa,
nekuti pundutso yadzikira.
Wobva wati uri kubudirira…
Asi hana yako iri kupi?
───
Pauro akati,
rudo rwemari runobereka marwadzo.
Vamwe vachichiva,
vakatsauka pakutenda,
vakazvibaya nemiseve yezvavakachiva.
Mari yawaitsvaka kuti ikufadze,
yava kukudya iwe.
Waida kuvaka imba,
asi wakaparadza mhuri.
Waida kupfuma,
asi wakarasikirwa nerukudzo.
Waida kuzivikanwa,
asi ukarasikirwa nehunhu.
Waida kuzara muhomwe,
asi mwoyo wako ukava gomba risina pasi.
Chii chawawana,
kana nyika yose iri mumaoko ako,
asi hana yako yarasika?
───
Lead: Kana mari ichida kuti unditengese hama yako…
Choir:Isiye! Isiye!
Lead: Kana pfuma ichida kuti utengese chokwadi…
Choir:Isiye! Isiye!
Lead: Kana pundutso ichida kuti utsike munhu asina simba…
Choir:Isiye! Isiye!
Lead: Kana kubudirira kwako kuchida kuti uvige hana yako…
Choir:
Haisi budiriro!
Haisi budiriro!
Uri kusungwa!
───
Usatengesa hana yako negoridhe!
Usatengesa amai vako nemari!
Usatengesa baba vako nepundutso!
Usatengesa shamwari yako nekuda kwechigaro!
Usatengesa chokwadi nekuda kwekambani!
Usatengesa Jesu nekuda kwemari!
Mari inogona kutenga mubhedha,
asi haigoni kutenga hope.
Mari inogona kutenga imba,
asi haigoni kutenga mhuri.
Mari inogona kutenga mushonga,
asi haigoni kuvimbisa upenyu.
Mari inogona kutenga vanhu,
asi haigoni kutenga rudo rwechokwadi.
Uchachengetei kana wafirwa nehana?
───
LEAD: Pfuma haisi chivi!
CHOIR:Asi usapfugamira pfuma!
LEAD: Kubudirira haisi chivi!
CHOIR:Asi usatengesere hana yako!
LEAD: Mari inogona kuuya!
CHOIR:Asi Mwari ngavave Tenzi!
LEAD: Mari inogona kuenda!
CHOIR:Asi kutenda ngakurege kuenda!
ALL:
Mwari ndiye Tenzi!
Mari mushandi!
Mwari ndiye Tenzi!
Pfuma mudziyo!
Mwari ndiye Tenzi!
Hana ngaiteerere!
Haukwanisi kushumira Mwari naMamoni!
───
Usanyanya kuda mari
kusvika wakanganwa kuda munhu.
Usanyanya kuda pfuma
kusvika wakanganwa Mwari.
Nokuti rimwe zuva
homwe inogona kuzara…
Asi hana ikashaya Mwari,
munhu anenge asina chinhu.
Mari ngaive mumaoko ako,
kwete mumwoyo mako.
Pfuma ngaishandire hupenyu,
kwete kuti hupenyu hushandire pfuma.
Mwari ndiye Tenzi…
Mamoni haasi Mwari.
— Sir Chaxi!!